زقزوق يهذي

طول عمري اتريق على الكاتب اللي بيكتب عمود صحفي يوميا، بيجيب أفكار منين؟! أكيد بييجي وقت ويفلس... مهما كان علمه أو معرفته، أصل مينفعش، بعدين هو بردو بشر، افرض اتخانق مع أهله يومها ومكانش فيه دماغ، افرض حد مات له، افرض صحي ملقاش حاجة يكتبها، افرض كان بيشجع الأهلي واتغلب؟! طبعا لو كان بيشجع الزمالك فلو كسب مش هيكتب لأن الطبيعي إنه يتغلب...

المهم يعني أنا من الآخر معنديش حاجة تتكتب هنا في المدونة، حالة جفاف فكري، يمكن لأني نسبيا كنت مشغول اوي الفترة اللي فاتت بعدين ابتدت مساحات فراغ تظهر؟ يمكن لأني تعبت بقى من أي حاجة؟ يمكن لأن خلاص قلت كتير قوي الفترة اللي فاتت ولازم أريّح على ما قول تاني؟! المهم اني فعلا معنديش حاجة اكتبها أو أقولها، لدرجة إني فكرت أقفل المدونة مؤقتا وهو حتى بدل ماهي شكلها يكسف كدة مع قلة عدد الزوار.... بس ممكن تكون دي حالة عامة، أغلب أصدقائي المدونين بردو بقالهم فترة مش بيكتبوا، والمسافة بين كل تدوينة والتانية وسعت اوي... شكلها موضة فعلا... وإلى زوال!

مش عارف ليه كل مابقى عايز اكتب وملاقيش حاجة تتكتب أفتكر قصائد وأزجال الشعراء اللي بيشتكوا فيها من إنهم مش قادرين يرتجلوا تاني!!! الله! طب مانتم ارتجلتوا الشكوى من عدم القدرة الارتجال؟! يعني المسألة تهريج بردو... طبعا أنا مش شاعر ولا اللي بكتبه يقرب للشعر أبدا... يمكن عشان شوية كنت بكتب مقامات بس اللي أقصده يعني إن خلاص حتى مش قادر أكتب بشكل كويس بلغة معقولة عن عجزي عن الكتابة، فحتى محصلتش الشاعر اللي بيشعر في عدم قدرته على الشعر... وماله!

المهم يعني بما إن معنديش حاجة أقولها فهاشكي من ظاهرة تفشت أوي من كذا سنة، وكل مرة أنسى أكتب عنها، هي متستاهلش أصلا، بس أهو الواحد بيفرج عن نفسه شوية...

في الكلية ومن يوم ما دخلتها كل سنة يطلع شاب بجيتار يقعد يغني وسط البنات ويصوروه بالكاميرات ولا كأنه مين يعني!!! بس ده مش غريب لأن الكلية دي هي اللي طلعت بتأييد إداري من قياداتها أحد رواد العهر الفني الشبابي... ربنا يهدي الجميع أصل بجد افرض الواحد كان صوته ينفع يغني... مين يضمن إنه مكانش يقف وسط البنات وينعق ويقرف الولاد؟! هي بردو فتنة فبلاش نقسو أوي في النقد رغم إن الظاهرة تفرس...

المهم بقى ظاهرة الغنى دي وظواهر تانية على شاكلتها زي اللي بيلعب رياضة ملهاش لزمة (كرة ماء مثلا) وقارفنا بيها وببطولاته ومبارياته وهو أصلا تلاقيه بيلعب في ناديه قدام سمنود مش قدام كرواتيا يعني!، غير طبعا البنت اللي ملهاش كلام الا عن الكافيهات الجميلة والعصاير الغريبة جدا اللي فيها... المهم كل دول يعني حاجة من اتنين على رأي صديقي العزيز محمود وجيه "هي الناس دي بتمثل ولا إحنا اللي فاهمين الدنيا غلط؟" هو كان ساعتها قال المثل لما قلت له فلان عيط لما إنجلترا خرجت من كاس العالم!!! قال ليه يعني "إنجليزي؟" وهي فعلا حركة تفرس يعني، أنا بتنرفز لما فريقي الأوروبي المفضل ميكسبش بس مش هابكي يعني!!! هو أنا للأمانة بردو بكيت كذا مرة في الكورة بس خلاص يعني، كلهم للمنتخب طبعا، أول مرة كانت سنة 1996 لما خسرنا من الكاميرون 2-1 في كأس الأمم رغم إن الماتش كان في المجموعة، والغريبة اني مبكيتش لما زامبيا شيلتنا 3-1 في التمانية! المرة التانية بردو في ماتش ملوش لزمة خسرناه من المغرب 1-0 من حاجي طبعا في 98، وكان الماتش الوحيد اللي خسرناه رغم اننا كنا ضامنين الوصول للتمانية وخدنا البطولة وقتها، المرة التالتة بردو المغرب وبردو حاجي بس هناك سنة 2001 في تصفيات المونديال، وكانت هزيمة أضعفت أملنا أوي...

ومرة عيطت من الفرحة لما جبنا جول في الجزائر هناك قبل ما يتعادلوا في ماتش عنابة المشهور لأن السنغال كانت كسبانة ناميبيا 3-0 بس قوتها، يعني صعدنا للمونديال لمدة خمس دقايق تقريبا... تصفيات 2002 دي ليها ذكرايت حلوة اوي معايا لأني رحت الماتشات اللي في القاهرة كلها بتاعتنا وكنت في أولى ثانوي مش بذاكر ودماغ... رحت أنا وفاروق ماتش المغرب 0-0 اللي لحد الوقت مش عارف ازاي مكسبناهوش، ورحت مباراة الجزائر التاريخية 5-2 ومباراة السنغال 1-0، الممل بقى إني بعد 5 سنين بالظبط من ماتش المغرب ده رحت مصر والمغرب تاني في كأس الأمم وفي نفس المدرج تقريبا ونفس المكان و0-0 تاني بنفس الطريقة، اللي هو 120 دقيقة مصر والمغرب 0-0 بنضيع ومبنكسبش وفي كل ماتش تجيلهم كورة تضيع بقدرة قادر وناخد نفسنا

بجد نفسي نكسب المغرب قبل ما اموت، من يوم ماتولدت لحد الوقت مكسبنهاش عاملة معانا زي السويد مع إنجلترا كدة بس أخف شوية الحمد لله، طبعا محدش ينسى إن المغرب فريقي المفضل عربيا بعد مصر مباشرة...

طبعا انا كدة كتبت أي كلام على طريقة الناس اللي بتريق عليهم، وماله مش مشكلة... اشمعنى أنا لأ يعني؟ وإن مش بهذي أصلا؟! "هيطلع واحد سخيف يقول لي اهو انت اعترفت إنك بتهذي".