مفيش مفاجآت

المفروض أسيب مسافة زمنية معقولة للبوست اللي قبل ده مباشرة عشان ياخد نفسه، بس مش مهم اللي عنده حاجة يرجع يقولها، البوست ده عن حاجة تانية.

زمان الواحد كان مجنون وفاكر إن فيه حاجة اسمها مفاجأة، لكن دلوقتي ابتديت أدرك ده، ومهما حصل مش هتفاجئ، لأن خلاص، كل شيء بقى متوقع والتفكير والشطحات بتحرق كل الفانتازيات، الإمام علي قال "لولا أن الكلام يعاد لنفد"، وفعلا مفيش جديد، كل شيء من غير بريق، والدهشة بقت شعور منقرض، يعني لو قلت لي عامل لك مفاجأة فبردو مش هتفاجئ، هافرح آه لو حاجة سعيدة بس مش هتفاجئ بيها يعني... خد عندك حاجات مش هتفاجئني:

صحيت بكرة لقتني في مكتب الجزيرة في بغداد ورموا لي المايك وبعتوني أغطي معركة.

مكتوب لي خلال يومين إني أبقى واقف على باب السيدة أدي نفحة نعناع وآخد اللي فيه القسمة.

لحيتي الخفيفة جدا دي أزهرت وبقت زي غزل البنات بتدخل جوة ياقة القميص.

واقف في ايدي البوليتزر وبيقولوا لي تهديها لمين؟

مصر خدت كاس العالم وأنا مدرب الفريق أو هداف البطولة اللي جاب جول الفاينال.

بفتح التلفزيون لقيت خبر تأسيس الاتحاد الإسلامي وإزالة آخر آثار الكيان الإسرائيلي.

الحزب الوطني خد توجه إسلامي.

مصلوب في ميدان عام بتهمة الخيانة العظمى.

طلعت واحد تاني غير عمرو فهمي.

بعلق على فاينال كاس العالم.

طلعت لي خياشيم تمكني من الحياة تحت الماء والكلام مع الكائنات البحرية بطبيعية.

صوتي حلو وعملت الـBest seller of all time وبفاضل بين 30 سيناريو لأفلام عالمية.

شغال تباع على خط رمسيس-عبود.

نزلت من الشغل لقيت حبيبتي مستنياني ومبتسمة بملائكية.

فقدت السمع أو البصر أو الكلام أو الحركة أو بعضهم أو كلهم.

مؤسستي الإعلامية مضت عقد امتياز يخلي شبكتها الإخبارية الأولى في أمريكا.

ماسك في ايدي ديوان حافظ الشيرازي وبقراه بسهولة قبل النوم.

حلمي القديم بحديقتي الطبيعية اتحقق وعايش وسط الحيوانات.

الألوان ملهاش دلالة كبيرة أوي أد ماهي عبثية بوجه عام، يمكن