أكيد سؤال تقليدي واتأخرت في الإجابة عليه، بس متأخر أحسن من مفيش خالص... هنا أنا بحاول أقول ليه عملت المدونة دي... وليه بكتب فيها... وليه مستمر هنا وليه مغيرتهاش وليه بكتب بالإنجليزي ساعات وليه وليه وليه وليه... طبعا كل ده على أساس إن مدونتي مهمة جدا ومفيش زيها في العالم وإن الناس شاغلة بالها بالأجوبة دي... وده طبعا فرض مستحيل... بس كونه مستحيل هو أحد أسباب إني بادون بل وأول الأسباب...
أولا، لماذا تدوّن؟
من زمان جدا بحب الكتابة، وكانوا بيتنبئوا لي بمستقبل باهر في الكتابة والخطابة والهجاء "قلة أدب من بدري"، طبعا مع الأيام فتحت اللي كنت بكتبه زمان وكان هاين عليا أقطعه من قرفه، أصل إيه اللي فيه كويس يخليهم يتنبئوا لي بأي حاجة عدلة؟! المهم طالما شايف نفسي باعرف اكتب أو عندي حاجة عايز أقولها، فبالتأكيد هحتاج مدونة، ده في ظل إن المدونات بقت حركة منتشرة بين أغلب الشباب، خصوصا إنها بتبقى الجرنال اللي انت بتبقى رئيس تحريره، يعني تمد رجليك ع المكتب وتاخد الكيبورد على حجرك وتكتب اللي يعجبك ومتلتزمش بدورية ولا أي مسئولية... باشا من الآخر...
طيب أنا هكتب إيه؟ أكيد مش الكتابة لأجل الكتابة، وأولا مش الكتابة الأدبية، لأن الأعمال الركيكة اللي بكتبها مبنزلهاش هنا طبعا، وده لأني بتخنق من اللي عاملين مدوناتهم كلها مجال أدبي – انت مش منهم يا زوزة- وطبعا بتخنق من اللي مخليين مجال تخصصهم طاغي ع المدونة رغم انها مدونة شخصية، زي أمادو والسينما مثلا... فكان لازم أكتب عن الحاجات اللي تيجي في بالي والسلام، واللي حاسس إني أحب حد يشاركني فيها، ولو حابب حد يسمع بس وميقولش رأيه فهلغي التعليقات زي ما عملت في تدوينة سابقة... يعني الموضوع فيه فضفضة...
وبالنسبة للحاجات اللي ممكن تبقى جادة زي المقالات وكدة فدي الهدف منها تسريب قناعاتي الشخصية ونشر أفكار أؤمن بيها وبلا شك السخرية-بالمرة يعني-من معارضيها...
غير كدة المدونة فرصة إن حد يدخل يقول لي انت مبتفهمش حاجة، وأنا أكيد مش عاملها عشان الناس تقعد تصفق لي ع الفاضية والمليانة، وكل شوية "انت جامد يخرب بيتك" أو "يا ابني انت خسارة في مصر" أو أي هبل من اللي كلاب البحر بيفرحوا بيه... ويمكن دول في حد ذاتهم أحد أسباب اني بدوّن، يعني ميفتكروش إني هسيبهم يضايقوا الخلق كدة بوجودهم هما والبلهاء اللي بيصفقوا لهم، لا طبعا... مش هعتقهم في مناسبة أو غير مناسبة، وده عندي كيف بصراحة...
غير كدة باشرح الأفكار اللي ملتبسة، زي فكرة مشروع تخرجنا اللي بتتفهم كل شوية بالعكس، ودي ليها تدوينة تانية قريب إن شاء الله عشان كفاية بجد...
ثانيا، لماذا بالإنجليزية أحيانا؟
لأن المدونة دي عرضة تقع في ايد أي حد مش عربي، غير إن كل لغة ليها جوها، ممكن الواحد يحس إن التدوينة دي تكون أنسب بمفردات الإنجليزية وجوها، زي ما بندون بالفصحى وأحيانا بالعامية... نفس الكلام ينطبق على التدوين بأي لغة تانية ساعات الواحد بيبقى عايز يكتب وينشر بس مش عايز حد يقرا... فيعمل ايه؟ ممكن يكتب برموز مبهمة... أو بلغة غير منتشرة غير الإنجليزية... المهم إن الموضوع في الآخر مفيهوش عيشة يعني....
ثالثا، انت عايز توصل لإيه؟
وانت مالك!!! يا عم بعبث حتى ملكش فيه! المفروض تكون فهمت من اللي فوق، مش عبقرية يعني!
رابعا، ليه اسم المدونة زقزوق؟
عشان ده اسم شهرتي، اشتهرت بيه أوي في ثانوي، في الحقيقة هو لقب عيلتي أصلا... بس الغريب إنه مش مثبت في أي بطاقة... يعني حتى اسمي لحد ما اعرفه لغاية الجد الثاني "7 أسماء عشان المركبات" مفيهوش زقزوق...! بس جدي ووالدي اشتهروا بيه... فمن الطبيعي أتمسّك أنا بالاسم بردو... خصوصا إنه فكاهي شوية وصيغة مبالغة، يعني زي العصفور الرغاي اللي عمال يزقزق ليل نهار... أهو أنا كدة...
خامسا، ليه عملت التدوينة دي أصلا؟
مش عارف تحديدا، يمكن زهق، يمكن فكرة تستحق الكتابة أو لا تستحق "ماهو مش كله يستاهل بس بيتكتب"، عشان أحط النقط ع الحروف مثلا... أي حاجة وخلاص.
هناك 14 تعليقًا:
من حقك تكتب الى انت عايزه بأى لغة متفرقش وبعدين كل واحد حر ان شاء الله تكتب بالهندى كمان وياريت تعرض بعض من إنتاجك القديم خلينا نضحك شوية :)وسيبك من كلاب البحر
كتب يباشا وورينا قناعاتك الفكريه اللي بتقول عليها
بس انا مش معاك في لفظة كلاب البحر يعني اتفق معاك في المعني العام لكن في الالفاظ لا
وبعدين ولاتزعل مش هنقلك حلو ولا حاجه انت مدونتك أسوأمدونه دخلتها ف حياتي ويريت تلغيها ومشوفكش بتكتب حاجه تانيه
بهزر 'طبعا انا هقلك بيعجبني ايه ف المدونه بتاعتك ان الواحد غالبا مبعرفش يتوقع انت هتتكلم عن أيه يعني صعب نخمن هتتكلم في ايه غير كده بيعجبني أسلوبك ف الكتابه بنسبه كبيره , وخاصه أسلوبك الساخر يمكن لاني كمان بحب اتباع نفس الاسلوب في تناول مواضيع متعدده
أما قناعاتك الفكريه ففي خلافات كتيـــــــــــر بيننا لكن تبقي صديق وحبيب وأخ
بوركت يباشا وربنا يكرمك وميحرمناش من كتاباتك
والسلام
Hey Amr,Good questions and cool answers :)
Honestly speaking i like your way of writing especially bel 3arabeya el fos7a, like the last post which was a very good one.
Go on dayman ya Amr and always to the best insha'Allah :)
مفيش احلي انك تكتب اللى انت عايزه بدون وجود شخص يعدل عليك او يحذف اجزاء انت شايفها انها مهمة
يعنى انت رئيس تحريرك وانت رقيبك وانت المحرر من الاخر انت حر نفسك
ازيك يا ريس
الكلام اللى انت بتقوله ده صح كل المدونين دلوقتى نازلين كلام فى شعر و مش بيكتبوا فى حاجه تانيه المدونات دى بتبقى خنيقة :s
بس معلش دلوقتى مفيش حد زى امادو ده خان رد عنده :p بس بصراحه مع انها سينما و خنيقه بس هو بيعملها جو لذيذ :d
اعتقد انك لخصت سبب التدوين بالنسبة ليا انا فى جملة
"يعني الموضوع فيه فضفضة "
مش اكتر..يعنى لا هى فذلكة ولا فرض عضلات بحبة اشعار او مقالات
وكويس انك جاوبت على السؤال ده سواء متاخر او لا على الاقل انت مخلتش حد يمسك عليك حاجة
تصدق بقى اول مرة اعرف موضوع اسم زقزوق انه فى عيلتكم.. وحتى كنت كتير عايزة اسئلك الاسم ده جالك ازاى
عامة هو لايق عليك ونحته بشخصيتك مجرد ما نسمع الحروف دى نفتكر عمرو فهمى على طول
انزل باسمايلز واحد لابس نظارة سودا هنا والنبى
البوست مقنع جداً
يكن دا اكتر كلام حسيته فعلاً ينطبق عليك ويعبر عنك
كويس انك شرحت اسبابك
حلوةالأسئلة والإجابات
وفعلاأناموافقك في كلكلامك المدونةفضفضة لكل واحد
بس مدونتك بجد أنت عارف رأي فيها ..روعة
استمرفي الكتابةعشان نقرأ
بقى مدونتى بتخنقك عشان كلها سينما
امممم....
طيب، فاكر السياح اللى عملتهولى فى موضوع الكبدة، وفاكر السياح اللى كان فى موضوع قبليه، فاكر؟
أدخل هنا بقى
http://amadounomadic.blogspot.com/2007/06/blog-post_29.html
نياهاهاهاهاهاهاهاهاهاهاها
بالمناسبة انا كنت بتخنق من انك بتكتب بالانجليزى لكن ماعترضتش لأنه مش من حقى وانت حر تكتب اللى انت عايزه، اشمعنى اعترضت على انى باكتب عن السينما؟
الأول بشكر كل اللي علقوا فوق
أمادو: لا بالعكس، كان من حقك تنتقد ده طبعا، هو انا فاتح المدونة عشان الناس تقول اللي عاجبها وبس؟
الحاجة التانية بقى، يعني انا في الصورة اياها كنت على قهوة في شارع رئيسي، مش في اوضة وقافل على نفسي مثلا... يعني الفعل عام، بعدين مش حجر تفاح بجوز جنيهات على فينيسيا هيزعلني منك :P
نرد شوية بقى بالتفصيل:
أحمد: بالظبط ومن حق أي حد ينتقدني بردو
محمد: يعني غربان مش عاجب، كلاب بحر مش عاجب، دبرني يا شيخ، عموما أنا شايف إني "مقري" بدرجة كبيرة تسهل التنبؤ بأي حاجة هكتبها
سلمى: شكرا يا فندم
عمرو: أيوة بالظبط
محمد: أيوة يا عم أيوة، أمادو معدّي وبيتخنق لما حد يقول إنه بيتخنق من السينما في مدونته
علاء: طيب
دينا: والله دورت ع اللوجو ملقتوش هههههههههه
محمد: يعني مصداقية كويسة؟
علا: ربنا يخليكي إحنا مش أد ده
أمادو: مش بتخنقني لأن مضمونها وحش، إنت عارف إني بحب أقرا اللي بتكتبه في السينما بس لما ينزل في جودنيوز
أفضل حاجه في مدونتك انها كل مره فيها جديد وفعلا ما بتوقعش انت هاتكتب ايه ،بس ليه تعليق علي فكره الاسلوب الساخر،مش متفقه في نقطه اننا نستخدمه في التعليق علي وجهة نظر مختلفه قد يكون جارح للقارئ حتي لو هو ما بيتبناش وجهة النظر دي والاسلوب ده كان واضح في التدوينه دي واللي قبلها، علي العموم مش عارفه بالظبط مدي منطقية الكلام اللي بقوله بس هو ده الاحساس اللي وصلني وانا بقرأ
والله ما أقصد الناس الكويسة، اللي أقصدهم هما ميستحقوش غير كدة... آسف يا ألفت لو أسلوبي بيضايقك... بس هما تخطوا مرحلة إنهم مجرد يضايقوا اللي حواليهم
احترم ردك وأسلوبك ووجهة نظرك :)
إرسال تعليق