YOUTHINK مشروع اسمه

اتأخرت شوية لكن ممكن اللي بيقرا يسامحني، الكلام على مشروع تخرجنا، اللي هو عبارة عن مجلة شهرية فئة جمهورها الشباب المسلم حول العالم "الأنجلوفون كمرحلة أولى"، يعني هي مجلة شبابية lifestyle ممكن تعجب إن شاء الله...

دي كلمة بسيطة عن فكرة المجلة باختصار شديد، المجلة فكرتها في الأول مكانتش كدة بالظبط، لكن اللي خلاها كدة إن فيه ناس آمنت بيها وتبنتها، وعدلت وأضافت وهذبت، وده اللي يخليها متبقاش فكرة واحد، بل فكرة مجموعة، وحلم مشترك، وده اللي يفرقها عن أي حلم فردي لشخص طلع فكرة وعايزها زي ما كانت في دماغه وبس، كدة عمرها أطول إن شاء الله...

الفكرة بدأت في شهر أكتوبر 2005، أول حد تلقاها واعتنقها كان أيمن الشربيني، وبعدين جه دور أميرة قاسم وعائشة الحداد، وبعدين إنجي غزلان، وبعدين بقية الأعضاء تدريجيا...

جه دوري اتكلم شوية بشكل شخصي، وأقول ليه بحب المجلة، على فكرة اسمها YOUTHINK وشعارها فوق يوضح فكرة الاسم اللي منحته لينا عائشة...

يمكن تحت على اليمين في المدونة هتلاقي لوجو مكتوب عليه "فخور بأني مدون إسلامي"، وده يعني إني إسلامي الفكر، مش إني عامل المدونة منبر خطابة دينية مثلا! المهم كوني إسلامي يخلي مجلة زي دي تدخل ضمن نطاق أحلامي للأمة بمساحة كبيرة جدا، خصوصا إني المفروض صحفي...

المجلة ليها نسخة إلكترونية على فكرة، هتبقى متاحة قريب جدا إن شاء الله، وهتستمر لمدة عام مبدئيا، وإن شاء الله تستمر بعده...

مش عارف أنا حاسس إن كلامي عشوائي أوي بس معلش، مش عارف أقول إيه تاني... ممكن أشكر كل اللي تعب أوي في الفكرة دي، واللي عرفها من بعيد وشجع، واللي فهمها وعدل فيها وأضاف وحذف عشان تخرج كدة...

بس لازم فيه ناس تختص بالشكر، أولهم عائشة الحداد لأنها اللي شاركت في كل حاجة وبنفس القوة، وإدارتها كانت أكثر من رائعة ومنسقة، ورغم ظروف السفر والمذاكرة إلا إنها كانت رمانة ميزان العمل، ربنا يوفقها ويكرمها دايما...

أشكر أوي الناس اللي كانت شارية المشروع والفكرة من غير ما أسميهم، هما عارفين نفسهم كويس أوي... ربنا يخليكم ليا كلكم...

وشخصيا، يمكن على المستوى الشخصي المشروع مخرجش برة دماغي كتير، أصحابي ومعارفي متكلمناش عنه كتير، ولا حتى أهلي، امبارح وأنا داخل بنسخي من باب البيت، كلهم افتكروا اني آه كان عندي مشروع وده اللي كان بيرجعني الصبح الأسبوع اللي فات وكدة... وإن ده اللي سمعوني بتكلم عنه وبتاع... وده أحسن، عشان متبقاش فيه ضوضاء...

عايز أشكر كل حد شجعني ومستغربش من الفكرة ولا استنكرها من اللي سألوني مشروعك ايه وحكيت لهم، مش هنسى أ.محمد مصطفى لما قال لي "متخليش سقف لأحلامك" والفكرة إني ساعتها قلت له أنا عارف ان الفكرة طموحة وكدة يعني، طبعا أنا مش شايفها طموحة، بس لأني اعتدت إن الناس تشوفها بعيدة أوي فكنت بريح دماغي...

شكرا لكل حد وعدني بالمساعدة وساعدني أو مساعدنيش، شكرا لكل حد قال لي هبقى معاك وبقى أو مبقاش...

فاضل إني أقول إن يوم الأربعاء الجاي بقاعة الاحتفالات بالمدينة الجامعية للطلاب فيه يوم تقييم للمجلات، وبغض النظر إني عارف إن فرصتنا ضعيفة جدا إننا ناخد مركز، بس يا ريت الناس تيجي، حتى اللي بقالهم كتير مشافونيش ووحشتهم فرصة نتقابل ونضحك شوية... لأننا كدة كدة هنحتفل إن شاء الله، ومشروعنا مش محتاج شهادة رسمية تؤكد نجاحه... مش غرور بس إيمان...

أحب أشكر أوي مجموعة مشروع كتبخانة، بجد أنا فرحان إن فيه مجموعة من زمايلي كدة، ما شاء الله بجد، ربنا يبارك لكم ويمكن فرحتي النهاردة الصبح بمشروعكم كانت باينة أوي...