استجواب سخيف

فيه استجواب جالي بناء على طلب شخصي، وعشان كدة بشكر دينا إنها مررته لي وبكرر للمرة الثانية بناء على طلبي أنا، المهم يعني الاستجواب ده أو "التاج" عبارة عن مجموعة أسئلة كتبهم واحد أقل حاجة تتقال فيه إنه تعبان فكريا، والحقيقة إن انتشار التاج ده بين المدونات راجع لأحد سببين، أول سبب أو أول حالة الناس اللي فاكراه لذيذ وعاجبهم ودول حالة ميئوس منها، السبب الثاني أو الحالة الأخرى هو الناس اللي عارفة إنه ميسواش بس من باب الإحراج اتمرر لهم فبيجاوبوا عليه وعشان يأكدوا إنهم مش قرفانين منه فبيمرروه لناس تانية... المهم أنا طلبت إنه ييجي لي عشان ألبس عباءة البطل وأكشف التاج ده على حقيقته يمكن الغلبان اللي صمم أسئلته يمر هنا ويقرأ أو يعرف حقيقته

قبل ما أبدأ في الإجابة، ناس كتير أوي فاكرين إني مبشوفش في الحاجات إلا السلبي منها، وأنا بقول في النقطة دي دفاعا عن نفسي إن فيه قصة للسيد المسيح عليه السلام كان مر هو وتلاميذه على جيفة شكلها مقزز، فتقززوا منها جدا... فابتسم وقال لهم "أسنانها بيضاء" هو هنا شاف الجانب الإيجابي اللي فيها بعبقرية نبوية أتمنى أتشبه بيه فيها، لكن في نفس الوقت المسيح أو أي نبي لو جت له حاجة وحشة وحد بيقنعه إنها كويسة وشايف ناس بتصفق لها فهيقول الحق ولو على رقبته، وهنا بردو أتمنى أتشبه بيه... يمكن فيه رواية عن عمر بن الخطاب مش متأكد من صحتها بس قال فيها من ضمن الحاجات اللي تعتبر الأحب إليه في الدنيا "قول الحق وإن كان مرا" متهيألي التمهيد ده يزيل التباس كبير أوي قبل ما أبتدي أرد



من هو:أحب شخص لقلبك فى الدنيا؟
من الأحياء أمي

انسان مستعد تضحي بحياتك - ركز فى كلمة حياتك- علشانة؟
سؤال سخيف، مش هجاوبه لأن ممكن أكون بمثل

اسم أول حب؟
يعني هل وصل باللي كاتب الأسئلة مستوى الاضمحلال الفكري إنه يفتكر إن حد ممكن يجاوب السؤال ده باسم شخص ما! ولا هو مستني واحد يعمل فيها عابد القاهرة ويقول "الله" وكأنه هو الوحيد التقي وكلنا بنجري وراء أهواء دنيوية... سؤال غبي

اسم آخر حب (حتى الان)؟
نفس الإجابة السابقة

ما هو :اسم أجمل كتاب كتبه بشر قرأته ومحتفظ به حتى الآن؟
يمكن السؤال ده على سبيل الاستثناء فيه لمحة ذكاء شوية، عشان محدش يقول القرآن الكريم زي ما بتخنق وشرحت السبب في تدوينة سابقة بس في كل الأحوال مفيش في دماغي كتاب معين

اسم كتاب-كتبه بشر بردو- انت متعلق بيه وبتقرأه كل فترة؟
إيه الفرق؟

شىء تحس بالراحة النفسية عندما تنظر اليه ؟
القطط

مكان تحس فيه بالحنين الى شىء لا تدرى ماهو و ذكريات جارفة الى لاشىء؟
لو ذكريات لشيء معين فأكيد شارع الغرفة التجارية في الجيزة، ولو لأسباب غامضة فممكن أقول غية الحمام في بيتنا القديم

مكان تحس بالراحة عندما تدخله ؟
الإجابة المنطقية اللي كلنا هنتهرب منها هي الحمام، بس ساعتها هنقول إن السؤال مش اللي لما بتخرج منه بل لما بتدخل له، ممكن أقول بيتي بشكل عام، والشارع في الفجر

أجمل مدينة زرتها داخل مصر ؟
بورسعيد

أجمل مكان طبيعي رأيته داخل مصر؟
جبل عجيبة-مطروح

اهم جهاز منزلى انت متعلق بيه او بتستخدمه كتير ؟
الكومبيوتر

نوع هاتفك المحمول؟
كنت بشتغل في جرنال أصفر من فترة قريبة عشان أكل العيش، فبعد كل حوار مع لاعب مشهور كانوا بيكتبوا ماركة السيارة ونوع الموبايل!!! ده سؤال غير هادف بالمرة، بس عموما نوكيا 2300

سرعة بروسيسور جهازك ؟
سؤال قمة في التفاهة، خصوصا إنه مثلا مش محدد لو أقل من كذا فانتقل للسؤال التالي ولا اتركه!!! عموما هو 2.6 ج هـ

حجم ذاكرة –هارد- جهازك ؟
كمثل، بس 80 ج

المساحة التى تشغلها المواد الاسلامية على جهازك ؟
وانت مال أهلك؟ يعني لو قلت لك 80% مثلا هيبقى أنا شاب تقي، ماهو ممكن يكون 80% إسلاميات و20% إباحيات... بعدين هل المواد الإسلامية هي الخطب والدروس بس؟ متهيألي لو فيلم فيديو لحاجة نافعة أو ترفيهية حتى بس هادفة وغير سافلة فهي تعتبر مادة إسلامية بالمفهوم الأشمل

أهم هدف انت واضعه لحياتك دلوقتى ؟
أخلص كورس صعب أوي فاضل له أسبوع عشان أفوق شوية

مواصفات فتاة –أو فتى للبنات- الأحلام بالنسبة لك؟
يعني لو حددتها هتجيبلي واحدة مثلا؟ ولا على من تتوافر فيها الشروط أن وأن... بشكل عام فيه حاجات تبقى كويس لو متوافرة أهمها إنها يكون عندها خلفية قوية ومعرفة عميقة بمجال ما في الحياة، مش مدعية يعني... وأحس بمعرفتها دي لو سألتها في حاجة مش عارفها وأفادتني، غير كدة حاجات معتادة مش هضيف كتير لو كتبتها

صف ما يأتى :شعورك لما بتسمع كلمة مصر؟
كلمة مصر بحسها أوي في ماتشات الكورة في الاستاد... لكن النظام السياسي الحالي لاغي دلالة الكلمة عندي نسبيا

شعورك لما بتسمع كلام عن اليهود ؟
هو إيه الكلام بس؟ بس مبدئيا التعميم مرفوض، ومش كلهم صهاينة، يا ريت الفرق يتفهم

شعورك لما بتشوف ظابط شرطة ؟
لو ظابط مش صف ظابط فبحس إنه حيوان، وتعبير واقعي عن نظام همجي وحشي ودولة خوف ومعتقلات وظلم وغياب للحقوق وكبت للحريات، وساعات بحس برشوة ومحسوبية وقيم سلبية للصبح، بردو مش بعمم

شعورك لما بتشوف الكناس العجوز فى الطريق ؟
اشمعنى؟ بتعاطف

لون البطانية اللى بتتغطى بيها فى الشتاء ؟
بني، يخرب بيت الرذالة

لون الجورب-الشراب- المفضل لديك ؟
أبيض في برتقالي

احساسك اذا داست قدمك فى الطريق على مخلفات اخراج حيوان- *** ولا مؤاخذة؟
عادي

افكارك تجاه شاب ماشى فى الطريق يلبس جلابية بيضاء قصيرة وعمامة وله لحية وبجيبه السواك وبيده المصحف ؟
بفكر امتى لحيتي تبقى أغزر من كدة ولو شوية

إحساس يراودك فى اشارة مرور مغلقة بسبب مسئول كبير؟
إحساس زبالة، سكان 6 أكتوبر عارفينه بسبب البيه رئيس الوزراء وزيارة بوتين للأهرامات

مبمررش التاج لحد تكريما مني لجميع أصدقائي