وقفة عيد الحب

الصراحة أنا بكتب التدوينة دي بشيء من اللامبالاة بما يسمى عيد الحب اللي الاحتفال فيه بقى موضة بقاله كذا سنة بشكل يشكك الواحد إن الموضوع مش مستجد.. بل كأنه راسخ ومترسخ من قرون.

من كذا شهر كدة وأنا مروح من الشغل بالليل لاحظت إن شوارع الزمالك كلها قافلة تماما.. إيه الحكاية؟ ده عيد "الهالوين".. نعم ياخويا؟ هالوين ايه؟ بتاع قرع العسل اللي بيكشر عن أنيابه ده؟ اللي اسمه طبقا لترجمة أنيس عبيد "عيد القديسين"؟ أيوة هو!! وإذا ببنات وولاد لابسين قرون صناعية وبيبخوا على بعض سبراي في مظهر هزلي ماشككنيش للحظة إني في مصر.. لأن للأسف بقى معتاد إننا نتهبل على أي حاجة جاية من برة وخلاص.

نفس الكلام حصل قبل كذا سنة مع عيد الحب.. وفاكر كويس أوي شكل جامعة القاهرة يوم 14 فبراير واغلب البنات لابسين أحمر يا إما درجة من درجاته.. في حين كل ولد ناتع على قلبه دبدوب بشكل كرنفالي يفسد أي معاني حقيقية للحب.

أنا مش بتكلم على عيد الحب من نظرة شرعية ولا إن القديس فالنتاين ده كان راجل "مشهلاتي"، بل بتكلم من فلسفة الحب.. إيه معناه لو هو شعور مرشوش في الجو وكل الناس بتتسابق للتعبير عنه علنا وفي توقيت موحد؟ فين خصوصية كل علاقة وتواريخها المميزة اللي ماحدش يعرفها غير الطرفين الأساسيين بس؟ 

طبعا السنة دي الموضوع خد بعد تاني شوية.. يعني عيد الحب بقى إجباري بشكل يخلي صعب جدا إنك تقي نفسك من سهامه.. يعني مثلا أفتح الراديو أسمع على مدار أسبوع كامل قبل اليوم الموعود أغاني وفقرات مخصصة لعيد الحب، بل إعلانات صيدليات لعروض خاصة على البارفانات وأدوات التجميل (ويمكن حاجات تانية) بمناسبة عيد الحب!! بل رحت هايبر وان أجيب مستلزمات البيت من مكرونة ورز وما شابه فإذا بجناح كامل تم تخصيصه لهدايا عيد الحب من دباديب وما شابه.. صحيح بعضها عجبني لكن بمنحى عن المناسبة.

كل الدعاية دي والضجة والإصرار ده خلاني أحمد ربنا إني أجازة يوم الأحد من الشغل عشان مانزلش أشوف الوهم ده بعينيا بيتكرر.. بل هتسمر في البيت أشجع أتلتيكو مدريد ضد برشلونة.. طبعا أنا اتأكدت من شوية إن عيد الحب مانزلش أجازة رسمي السنة دي بقرار جمهوري.. يمكن كمان سنة ولا اتنين يحصل.

--------.

بشكل شخصي بقى.. أنا أخيرا حلقت شعري بعد 10 شهور كاملة من الصمود.. يعني حتى يوم ما اتجوزت اكتفيت بتظبيط الجوانب وقلت حلو اوي كدة وشكرا.. حلقت شعري بعد ما عشت دور "جيفاري" شوية بمعنى إنه كان نازل من ورا البيريه اللي بلبسه في البرد وكان مدي شعور إني بنتمي لتنظيم مسلح في كولومبيا مثلا خاصة إني كنت سايب شنبي ودقني منبتين.. وهما أصلا مش تقال.. فشكلهم شكل المشبوهين.. اللي لا مطلقين اللحية ولا حالقنها.. وبصراحة كنت مستمتع بالجو ده.. جو إني مابقاش مهتم بمظهري تماما واللي كان ممتع بالفعل إن الموضوع كان تلقائي وجه بالصدفة البحتة.

بس طبعا الشعر ابتدا يتساقط نتيجة لطوله المفرط..وبدأ يبقى عندي إحساس إن فيه بوادر صلع بتظهر في الجزء الأمامي من الرأس، فضلا عن الانتظار لحين جفاف الشعر عقب غسيله.. يبقى مكانش فيه غير اني احلق واشتري دماغي.. ماحلقتش الحلقة الشهيرة بتاعتي في ثانوي "درجة 3" بل حلقت حلقة معقولة وعادية ولأول مرة أحس إن شكلي أخيرا بيظهر سني.. دايما كان يدي انطباع إني أصغر.

حسيت بمجرد الخروج من صالون الحلاقة إن دماغي "خفت" وإن كان فيه تقل عليها فعلا.. وحسيت بالهوا قريب من مخي أكتر.. حسيت إني خفيف أكتر.

-------.

حاجة أخيرة.. فيه صورة عصفور موجودة في العمود اللي على الشمال ده.. ده هايبرلينك لصفحتي على تويتر.. أخيرا بمشي في طريق إني أبقى من مهاويس إرسال "التويتس".. ميزته الأولى إنه بيخليني أهرتل بإيجاز... قال يعني بقول "حِكَم".