Por eso, me gusta Alonso

الحمد لله، ده اللي أقدر أقوله... أنا هتكلم بالعامية وآخد راحتي شوية، حاليا بتدرب بقالي 3 أسابيع في القسم العربي بوكالة الأنباء الإسبانية "إفي"www.efe.com ، وفاضل لي في تدريبي أسبوع واحد بس وينتهي الحلم المجهد...

بتدرب كمترجم صحفي رياضي بالأساس وسياسي في حال النقص العددي للمترجمين... طبعا المسألة مش تدريب بالمعنى اللي كنت متخيله لأن عندهم الشغل شغل جدا، بشكل قاسي أوي... الحمد لله حتى الآن متهيألي عملت شغل كويس وفيه كذا تيكر من اللي ترجمتهم اتاخدوا بالفعل في صحف عربية وشفتهم منشورين بأسلوبي، يعني فيه تيكر نزل في "الشرق الأوسط" وواحد تاني في "الحياة" وحوالي أربعة في صحيفة يومية مصرية كنت بتدرب فيها زمان، وسبحان الله التيكرز بتاعتي نزلت في نفس الصفحة اللي كان بيطلع عيني فيها من اللي كان ماسكها، دارت الأيام وبقى بياخد تيكرز وتقارير من وكالات الأنباء ومن ضمنهم اللي أنا عملته... شعور غريب، يعني أقل من سنتين وانعكست الآية تقريبا... سبحان الله فعلا!!!

المهم اكتشفت النهاردة وأنا في الشغل بالليل إن زميلي بيقول لي شوف فيه خبر لذيذ اوي في جريدة أردنية، ألونسو بيقول كذا كذا وبتاع!!! قلت له التيكر ده أنا لسة عامله!!! دي ترجمتي وفيها كذا وكذا... وفعلا كان هو... شعور جميل جدا الحمد لله، الخبر ده تحديدا اكتشفت إنه موجود في أكثر من جرنال عربي، لدرجة إنه نزل على سايت المنار اللي كان نفسي زمان أشتغل فيها كمراسل أو كأي حاجة حتى... والمفاجأة بردو الجزيرة الرياضية!!!

تجربتي حتى الآن في الترجمة الصحفية من الإسباني للعربي قاسية جدا، لأن ساعات بقابل كلمات كتير صعبة ومش عارفها، ولما بحاول أترجمها بيجيلي إحباط من أشكال القواميس "الماموثية" اللي محطوطة هناك، فبستخدم النت وبتطلع لي الترجمة بالإنجليزي وساعات مبفهمهاش بردو لحد ما اقرا الـword definition، وألونسو صاحب الخبر ده تحديدا قبل كدة ترجمت له تقرير صعب جدا عن التطويرات اللي عايز يقوم بيها في عربيته عشان الموسم الجديد وبتاع، وطبعا صدمت بأنفاق التهوية والمحركات الأيروديناميكية، ومضمار الحلبة وإلى آخر الكلام ده... أنا فاكر إني آخر فقرة ساعتها قلت للي بيتابع شغلي مش عارف أترجمها من الآخر!!! طبعا فصلت.. لأني غير الأعذار المعتادة إني بنام قليل وبشتغل تاني بالليل شغل فيه ترجمة بردو بس من عربي وإسباني لإنجليزي، يعني وأنا نايم دماغي بتعمل قفلة، غير إن التقرير نفسه صعب مش سهل وأنا إسبانيتي مكتسبة ومدرستش أكاديميا بشكل متخصص ولا سافرت أي بلد بتتكلم إسباني!! بس الحمد لله أهو كله بيعدي... وكلها أسبوع وينتهي التدريب وأحتفظ بالذكرى الجميلة...

مش عايز أقول إني حبيت فرناندو ألونسو بسبب الخبر ده!

دي روابط للي عايز يقرا خبر ألونسو السهل اللي نزل في كذا مكان:

http://www.manartv.com.lb/NewsSite/NewsDetails.aspx?id=11851

http://www.alrai.com/pages.php?news_id=144267

http://www.addustour.com/news/Viewoldnews.asp?Nid=230317

http://www.alwatan.com.kw/Default.aspx?MgDid=471378&pageId=346

http://www.aljazeerasport.net/NR/exeres/EC54F02A-80AF-4AA4-872C-34C2F8CECBBB.htm