قال فؤاد حداد:
اصحى يا نايم وحد الدايم
وقول نويت بكره إن حييت
الشهر صايم والفجر قايم
اصحى يا نايم وحد الرزاق
رمضان كريم
مسحراتي ومعدي
منقراتي ومين قدي
الطبلة عالية في أحضاني
زي البيان زي النشرة
في ستة اكتوبر عشره
من الهلال الرمضاني
كان قلبي صخر الحنية
في المعركه للحرية
وللسلام اللي هداني
والنسمة هلت بحرية
يا مصر يا شهد الشهدا
الجنة شمسك وترابك
أصوم واصلى في محرابك
واسمع الشط الثاني
الله اكبر وأداني
آه من هواي في اوطاني
آه من شقاي ومن طربني
الأرض تتكلم عربي
والدنيا تسمع بوداني
نور الوجود من وجداني
زقاقي يفتح لي ميداني
حبيبي خدني وعداني
المشي طاب لي والدق على طبلي
ناس كانوا قبلي قالوا في الأمثال
الرجل تدب مطرح ماتحب
وأنا صنعتي مسحراتي في البلد جوال
حبيت ودبيت كما العاشق ليالي طوال
وكل شبر وحته من بلدي حته من كبدي حته من موال
دخلت دار بعد دار والكل بيحيي
أنا اللي حي وشهيد في الجنه وفي حيي
الله اكبر كأن الشمس من ضيي
على أرض سينا في نار المعركه والصهد
وأنا والتراب المنور انتصرنا لبعض
وكنت صايم ملكت من السماء للارض
وكنت عطشان ما حدش ارتوى زيي
اصحى يانايم وحد الدايم
السعي للصوم خير من النوم
دي ليالي سمحة نجومها سبحة
اصحى يانايم يانايم اصحى
وحد الرزاق
هذا ما قاله شاعرنا، ولكنهم قتلوا كل شيء في حاضرنا، اغتالونا في مهودنا! حذفوا كل الصفحات وأبرزوا سطرا: "الضربة الجوية"!!! لم تعد كلمة "6 أكتوبر" تحمل للغالبية أكثر من اسم المدينة التي أحيا فيها، لأن الانتصار عاد مفرغا، والببغاوات تردد "السلام"، "الرخاء"، "لا للمزايدة على دور مصر"، "خضنا ست حروب لفلسطين"، "لولا مبارك... لكنا كالعراق الآن!"، إلى آخر هذا الهراء...
لنعيد قراءة الأسطر بأعلى، ونستشعرها بلسان صاحبها وقلبه، ولنبكي مصرنا.
هناك تعليقان (2):
عندك حق ياعمرو افرغوا اليوم من معناه
بس تعرف الكارثة في الجيل اللي بعدنا ..اخواتنا
النهاردة ، لقيت اختى بتقول بلا 6 أكتوبر بلا بتاع ، ده يوم مالوش لازمة ، ساعتها كنت هاتجنن ازاى تمسح باستيكة دماء شهداء روت أرض سيناء
ردت عليها وقلت حرام عليكم تبخسى حق الناس اللى ضحت بروحها ودمهاروت الارض وحررت البلد
قالت لى : يعنى عملوا ايه ما احنا زى مااحنا ..قلت لها هما ضحوا وحربوا عشان يحرروا بلادهم ، جاهدوا في سبيل الله ومصر ،ومالهمش فى السياسة واللى حصل بعدكده
لكن ، ياعمرو حزنت اوى ان دى الصورة اللي بقت في الإذهان أن يوم أكتوبر فعلا لم يعدسوى اسم مدنية تسكن فيها
حسبنا الله ونعم الوكيل
للأسف أيوة
إرسال تعليق