شوية كدة

النهاردة مكانش ينفع أسيب المدونة أكتر من كدة، مش عشان نفسي أكتب، لأ! بس عشان معنديش حاجة أقولها خلاص... عارف إنها المرة المليون اللي أقول فيها إني أفلست فكريا والكلام ده... بس المرة دي ليها معنى شوية... وهو إني هاسيب المدونة من غير تحديث لأجل غير مسمى، يعني معرفش لحد امتى، بس عشان محدش يستنى إني أكتب حاجة يعني... ده بفرض إن فيه حد بيستنى فعلا!!!

المهم يعني لحد ما أرجع أدون تاني إن شاء الله فالأرشيف بتاع المدونة متاح للي عايز يقرا القديم أو اللي كتبته قبل كدة، غير كدة لو فرضنا إن حد مثلا وحشه يقرا لي أو يحسني بأي شكل فأنا موجود يعني ممتش حتى الآن، وتقريبا كل اللي بيتابعوا المدونة أصحابي أو رفاق دراسة أو زمايل شغل، وفي كل الحالات سهل يشوفوني أو نتكلم ولو حتى أونلاين أو بالتليفون.... ولو مكنش يعرفني ففيه إيميل في البروفايل أو هيلاقيني فيس بوك... ليها ألف حل يعني...

المهم عشان مبقاش رغاي بردو قبل ما أودع، يا ريت اللي متضايق مني يتسامح معايا شوية، ويا ريت كل اللي يدخل هنا يدعي لي... إلى اللقاء :)