تدوينة عادية

من أوضع الحاجات اللي في الدنيا إن الإنسان المغرور لا يعترف بغروره، يعني مثلا لما حد ييجي يقولك عملت وسويت وهببت ونيلت وفي الآخر تيجي تقول له من باب الإحراج ليس إلا "برافو عليك" وتلاقيه بيقولك أخلجلتم تواضعنا وبتاع تبقى عايز تزقه في أي بلاعة مجاري، أصلا من أخنق الحاجات اللي في التاريخ إن الواحد يعلو فوق محيط أقرانه ويخاطبهم من منطلق تميزه، ويبدأ يمجد في نفسه إلى الأبد، علما بأنه لو طرح فكرة أو نقل تجربة أو إحساس أو مخباش الضعف البشري اللي عند كل الناس هيبقى أحسن بكتير بدل ما يخنق الناس وينفرهم منه، هضرب أمثلة معاكسة بدل ما أقول أمثلة قذرة
صديقي العزيز الشاعر محمد قرنة صاحب مدونة "والشعر لازم يحفظوه الناس" اللي موجودة في قايمة اللينكات، ده بأمانة شاعر مشفتش أخوه، وبيعرف يجيب المعنى من بذر العنب (على رأي محمود عبد العزيز)، وياما خد مراكز بل وصدر له ديوان وهو لسة من سننا ما شاء الله، ومع ذلك مرصعش مدونته ولا قعد يكلم اللي رايح واللي جاي على إنجازاته، أكيد لو فيه مناسبة هيقول عشان هيبقى عايزنا نفرح معاه، لكن مش هيقلب في الذاكرة ويقعد يقول عملت وسويت، لأن ده سلوك المفلسين وأصحاب المساحات الشاسعة من النقص الواضح وهما حتى مش مدركين إنهم بكدة بيفقدوا أي إنجاز بريقه

الأسبوع اللي فات كان مميز بالنسبة لي على مستوى الفرق اللي بحبها، يعني بداية من الأهلي رغم إننا ضيعنا الفوز بسهولة بس رجعنا بتعادل مريح، بعدها مانشستر يونايتد خسر في الدوري، وبرشلونة خسر في نفس اليوم، وريال مدريد كسب تاني يوم، وليفربول كمل النجاح، وكملت أوي لما ألونسو كسب في ماليزيا في الفورمولا 1، يا رب النتايج تكمل كدة إن شاء الله

الأسبوع ده بردو اشتغلت كتير اوي، رغم وجود الامتحانين بس بردو، بقت عادة، فكرة الشغل مع الامتحان بقت مقبولة اوي، الأحلى جدا إني اشتغلت 3 أيام في الأجازات، السبت كان أجازة رسمي أصلا والأحد كان عيد القيامة والاثنين كان شم النسيم، وطبعا البلد كانت فاضية وجميلة والطرق رايقة، والأحلى إن الأجواء حلوة جدا، لو أطول أشتغل في الأجازات متأخرش ثانية، دي مش أول مرة أشتغل في الأجازات، أول يوم في عيد الأضحى اللي فات اشتغلت بردو غصب عني رغم إنه كان قبل أيام قليلة جدا من أول امتحان في الفاينال مش ميدترم حتى، الميدترم كنت بمتحن وبشتغل في نفس اليوم عادي، وأشتغل ليلة الامتحان، زي مثلا عندي امتحان الأحد الجاي في مادة معرفش عنها كلمة، ومع ذلك هاشتغل السبت والأحد بردو!!! دعواتكم بقى إني ألحق الامتحان إن شاء الله

من الحاجات الكويسة إن في وسط الزحمة كدة خطفت مقابلة في وسط البلد مع العزيز جدا جدا عمرو (فراس)، وكان معانا زوف وأمادو، وأخيرا اتقابلنا بعد أكثر من 3 شهور من التخطيط الفاشل، ميزة عمرو إنه إنسان ببساطة ميتكررش بسهولة، إنسان تلاقيه جنبك وميسببلكش مشكلة، إنسان صادق جدا وروحه جميلة جدا، جميل أوي إن تبقى فيه دايما خانة لصديق حقيقي جديد، ورغم إن عمرو مش جديد لأننا أصدقاء بقالنا سنة تقريبا
أرجع للخروجة وأقول إن أمادو الشاب النضيف اللي مبياكلش إلا من الأماكن النضيفة، اتظلم معانا يا عيني واتحكم عليه ياكل من نجمة أوديون، ودي عربية كبدة وسجق مثال حي لاضمحلال الطموح التجاري، يعني لما يسمي العربية نجمة أوديون عشان هي قدام سينما أوديون، افرض السينما قفلت ولا اتحرقت؟ يسميها نجمة إيه بقى؟! المهم أمادو يا عيني كان بيشد السندوتشات والحذر هياكله، واقوله لسك ليك تاني... يقولي شكرا وياكل بقلق!!! طبعا العربية دي فكرتني بفاترينة كبدة وسجق بردو كنت زبون دائم عندها أيام السعيدية وكل ما أرجع الجيزة، كان اسمها أولاد رسلان، وعلى رأي أوديب أُلحق بالفاترينة وبقدرة قادر خدمة الشاورما! بس لسة مجربنهاش لأن لو هناكل شاورمة فتبقى نضيفة بقى!

كفاية كدة الليلة دي