أكيد مع الشهر ده لازم أفتكر الأغنية اللي بحبها جدا لفيروز، كل أغاني فيروز جميلة، لكن مجموعة بعينها غير عادية بالمرة...
"بعدك على بالي...
يا قمر الحلوين
يا زهر في تشرين
يا دهبي الغالي!
بعدك على بالي...
يا حلو يا مغرور
يا حبق ومنتور
على سطحي العالي!"
كنت لسة بتكلم مع حد عزيز عليا جدا، المهم إن فيه حد عمل معاه حركة مش كويسة شوية، والحركات دي شبه منظمة تقريبا، لدرجة انه اعتادها منه، بعدين لقيته بيقول إنه لسة بيحبه بردو! علقت على الكلمة بإنها "ضعف إيجابي"، وبعيد عن محادثتنا ساعتها بس فعلا حاجة غريبة اللي تخليك تضعف قدام حد مقدملكش حاجة كويسة... حاجة غريبة وإنسانية أوي في نفس الوقت.
"مرق الصيف بمواعيده
والهوا لملم عناقيده
وما عرفنا خبر!
عنك يا قمر!
وما حدا لوحلنا بإيده!
وتضل الليالي... وتروح الليالي...
بعدك على بالي... على بالي..."
بمناسبة نيسان أو أبريل بقى، امبارح نزلت من الشغل بدري شوية عشان ألحق آكل في المطعم القريب واروح مشوار بعد كدة، المهم اكلت ودخلت الحمام اغسل ايدي.. طلعت فوجئت بعاصفة ترابية تكاد تقتلع الشجر! فضلت باصص شوية كدة من ورا إزاز المطعم، المهم قلت بلا هم، ونزلت بردو... مشيت عمارتين كدة تقريبا بعدين وقفت تحت مدخل جراج لحد ما الهوا يهدا شوية... كان قوي أوي... والتراب داخل من تحت النضارة ومش شايف كويس، بس الجميل اني كنت حاسس بشعري بيطير... مش عشان أنا اللي بعمل إعلان شامبوهات البلد كلها، بس كان شعور جميل اوي... تغيير على الأقل!
بمناسبة الأكل، بقالي حوالي سنة تقريبا اعتدت آكل لوحدي كتير، الأول كان لا يمكن آكل إلا لو معايا حد، دلوقتي بقيت ساعات آخد الأكل وأقعد على الرصيف وآكل عادي... الحياة كانت وردية عن كدة شوية.
"بعدك على بالي...
يا قمر الحلوين
يا زهر في تشرين
يا دهبي الغالي!
بعدك على بالي...
يا حلو يا مغرور
يا حبق ومنتور
على سطحي العالي!"
هناك 7 تعليقات:
يمكن سبب الضعف قدام شخص مقدملناش حاجه كويسه ان الحب هبه من عند ربنا مش بأختياراتنا قوى يعنى
تقبل تحياتى
I adore Fairoz, sotha ra2e3 fe3lan, pure we feh 7enneya ;)
El akl bedoon so7ba fe3lan ta3mo mesh beyb2a zay lama yesharkak feh 7ad.ana kaman mawa3eed el koleya bet5alene mo3zam el esboo3 bakol lewa7de.
جميل أوي ورقيق أوي أوي البوست ده
أقولك سر
أنا أي حاجة بلاقي فيها فيروز غصب عني بلاقيني بكملها للآخر ومبحسش وانا بقراها اني بقرا حاجة رغم اني سريعة الملل احيانا
لكن فيروز في أي مكان
ليها سحر خاص جدا
ليها علاقة بكل تفصيلة صغيرة في الحياة حتى لو بدا للبعض انها حاجة هايفة متستاهلش الواحد يهتم بيها ويحبها للدرجة دي
وبعيدا عن فيروز،انت شبه بتنبئني بحاجة هتحصل
أنا من النوعية اللي مبقدرش آكل لوحدي أبدا
بس اهو كل حاجة بتيجي بالتعود
والواحد لو استنى حد
هيموت من الجوع
وده مينطبقش على الأكل بس
تحياتي على التدوينة الجميلة دي
gصح نسيت أقولك
إن مش كل الناس بتحترم الضعف الانساني الايجابي اللي انت اتكلمت عنه ده
أحيانا
بيستغلوه رغم كل شيء!
مكنتش متخيل إن التدوينة تتحس اوي كدة
الأول أرد على مها بعيدا عن البوكس: مش مهم التعليق، حتى لوة محدش علق بس المهم إن الكلام يتحس ، اهتمامك كبير عندنا يا فندم
عالمي أزرق: والمسألة مش حب بس، أد ماهو تمسك بالشعور اللي بيحسسنا إننا لسة بشر، المنتدى منور يا فندم
سلمى: مين ميحبش فيروز؟ على رأي عمرو اللي لسة فاتح مدونة جديدة، هي فيروز فيها تحب وتكره؟! دي تتحب بس! مفيش اختيار أصلا، أحيي ذوقك
ملكة: المشكلة في شعور الأكل المنفرد ده ان الواحد بيحس إنه زي العربية اللي داخلة محطة البنزين عشان تقدر تكمل مشوارها، وساعات ببقى مش جعان بس عارف إني هجوع بعد كام ساعة ومش هيبقى فيه مجال آكل، فبقوم بعملية أكل وقائي إذا جاز التعبير، ربنا يرحمنا
أكيد بيُستغل
مرورك أسعدني
ارف ياعمرو مش من عادتي أعلق على تعليق بس ردك عليا فكرني بمصطلح عندنا بنقوله على الحالة اللي احنا عايشينها دلوقتي دي
Materialism
ترس في آلة،والآلة بتلف،رمب وهي بتلف تدوس على كتير بس مش مهم
المهم انها تفضل تلف وتلف
وللاسف مبقتش موجودة رفاهية انك تقف تستريح او تستمتع بحاجة
إيه جرعة الكآبة دي؟
يلا خير ماعلينا
إن مكنتش مخطئ فالمصطلح يعني المادية، مش المادية بالمعنى الدارج، بس اللي هو غياب المعاني الروحية واختفاء آثارها... أتمنى يكون فهمي للمعن صح
عشان الأكل بيفكرنا اننا ترس فاحلى حاجة انه يشدنا ليه رفيق روحي يفكرنا اننا بردو بشر فيحصل تعادل ان مكانش تغليب
ردك ثري يا ملكة، ردي براحتك مش بفلوس
إرسال تعليق