ما حدث في ثربانتس

امبارح كان يوم مميز، مكنتش متوقع إنه يمشي زي ما حصل أبدا... أرجع فلاش باك وأحكي من الأول

في شهر يناير تقريبا أو حتى أواخر ديسمبر مش فاكر بالظبط، كنت بتكلم مع مدرسي وصاحبي بابلو نابارو في الكورة عادي، بعدين قلت له ليه منعملش في المعهد نشاط عن كرة القدم الإسبانية مثلا، أنا شايف الناس مخنوقة من عروض الأوبرا والأفلام التسجيلية والأمسيات الشعرية، الفكرة عجبته جدا وقال لي فل، عرضها على مدير المعهد ووافق وحجز لنا مكان في الأجندة الثقافية... بعدها وعلى مدار 3 شهور وعلى القهوة الوضيعة اللي في ميدان سليمان جوهر أو التليفونات أنا وبابلو بنتقابل ونفكر ممكن نعمل إيه في الحدث، اتفقنا إنها تكون محادثة مفتوحة للجميع عشان مينفعش ندعو ضيف ييجي ويكون معندوش فكرة عن الإسبانية كلغة خصوصا إن أغلب نقاد مصر مدعين والكويس جدا زي المستكاوي مثلا صعب نجيبه
المهم اتحدد للملتقى معاد يوم 17 أبريل، بعدين اتغير وبقى 19 أبريل، يمكن من فبراير اللي فات لحد امبارح أنا وبابلو متقابلناش وجها لوجه، كله إيميلات وتليفونات وكدة،

امبارح تحديدا أنا نزلت من بيتنا عادي مش في دماغي، رحت الشغل اللي خليته الخميس صباحي عكس العادة عشان أروح الندوة بالليل، وأنا متخيل تماما إنها هتبقى ندوة حلواني يعني، هنقول كلمتين وقُضيت، فوجئت بمديري في الشغل جايب لي الدعوة دي وبيحطها قدام الكومبيوتر بتاعي!!! طبعا اتفاجئت لأني مش متوقعها أبدا إن الموضوع فيه دعوات بقى وبتاع

طبعا حسيت إن الموضوع واخد بعد جد شوية، افتكرت إني مقلتش لاصحابي المهتمين بالكرة الإسبانية، اتصلت بيهم بعد الشغل واللي قدر منهم بييجي كانو الثلاثي إيهاب ومحمود يوسف القاضي (فيجو) ورئيس القسم الخارجي بجريدة القمة: محمد الخطيب (سيماجو) وطبعا الأخراني ده كان فيه بينه وبين بابلو صولات وجولات في النقاش
المهم قابلت بابلو على نفس القهوة زي ما اتفقنا قبل الندوة بأربع ساعات عشان نحسم هنتكلم عن إيه، لقيته بيقول لي إن الإدارة قالت له الصبح في يوم الندوة كدة وقتي إن التلفزيون جاي يصور!!! قلت له تلفزيون مين يا نهار اسود! المهم يعني حطينا النقط اللي هيكون فيها النقاش ورحنا كتبناهم في المعهد على الكومبيوتر وصورنا ورق المفردات بتاعة الكرة اللي بالإسباني والعربي والإنجليزي زي ما قلت في الإعلان اللي كان هنا
جت ساعة الحسم، الساعة 7 والقاعة مهويّة!!!! مفيش غير سيماجو بس اللي جه! وشوية ولقينا برنامج البيت بيتك المدعي جاي يصور، صحيح المصور بتاعهم راجل عسل بس ده ميمنعش إني بتخنق من البرنامج بدرجة كبيرة، لحد ما بقيت الناس جم وبالعافية كملنا 20 مثلا كان البرنامج بيعمل لقاءات مع بابلو وبعدين سجلوا معايا وسألوني أسئلة في منتهى الغباء
- إنت بتشتغل في وكالة الأنباء الإسبانية، ازاي يا ترى الصحافة الإسبانية بتستعد للمباراة؟
-ايه أهم تعليقات لاعبي برشلونة وإدارتهم على المباراة؟
وحاجات زي كدة بقى، طبعا فهمتهم إن القصة أصلا مش عشان برشلونة الفريق اللي بكرهه زي الزمالك بالظبط، بس قلت لهم إن في إسبانيا الناس مش هتموت يعني وتتفرج على الماتش، يعني بلاش صياعة وضحك على الناس! بعدها بقى قررنا نبدأ الندوة
حضر مدير المعهد يفتتح الندوة، وبعدين سابنا وكملت أنا وبابلو، اتكلمنا في كذا نقطة وكنا عاميلن جوايز بسيطة كدة عبارة عن مجلة عن كوبا أمريكا بالإنجليزي والإسباني للي يجاوب سؤال صح، بس طبعا سيماجو كان نجم الندوة، بيقفل على بابلو قفلات كل شوية، بنتكلم عن التحكيم مثلا، يروح سيماجو قايل إن الحكام بتتحامل على ريال مدريد، بابلو طبعا مبيطيقش سيرة ريال مدريد أصلا، راح رد بعنف شوية وخلى خابيير يأيد وجهة نظره، بعدين كان فيه مشارك فعال اسمه إبراهيم، سأل بابلو سؤال يضحك شوية باعتباره من مشجعي بالنثيا التعصبين وهي مدينته أصلا، لو بيدرب بالنثيا وهيجيب لاعب مصري هيختار مين؟ ساعتها بابلو قال أبو تريكة طبعا، واتكلم عليه كويس شوية، عرفت بعد كدة إن سيماجو كان عايز يقول له إن أبو تريكة كبير على بالنثيا عشان يولعها!!! من ضمن الحاجات اللي خرجت بيها بردو إن فكرة الترجمة الفورية دي صعبة موت، يمكن عرفت معاناة مروة زيملتي في الشغل واللي حضرت الندوة وشاركت بمداخلتين لأنها دايما كانت بتقدم فعاليات في المعهد، بعد الندوة حسيت إني مهنّج لأن من إسباني لعربي ومن عربي لإسباني وهكذا للأبد، وكمان كل ما أبص على الركن اللي قاعد فيه اصحابي ألاقي فيجو ميت من الضحك، وسيماجو كل ما بابلو يتكلم كويس عن بالنثيا يقلب وشه، كانت ندوة ليها طابع كوميدي، وده مش غريب عن سيماجو لأنه أكتر واحد في التاريخ ممكن يضحكني، والحمد لله مسكت نفسي إمبارح
من ضمن الحاجات الجميلة إني كنت قاعد ورايا علم مصر، يمكن من ساعة تحية العلم في مدرستي الابتدائية "العهد المنير" مكنتش جنب علم مصر، طبعا الحدث بسيط جدا ويكاد يكون تافه بس مش عارف ليه عشان علم إسبانيا كان موجود بردو وأنا قاعد ناحية علم بلدي كنت فرحان أوي، للمرة الأولى هنزل صورة ليا على المدونة من ساعة ما ابتديت التدوين في يوليو اللي فات، الصورة طبعا مش واضحة لأنها بكاميرا موبايل سيماجو

من اليسار لليمين: مدير المعهد، بابلو، عمرو

سيماجو رافض إن صورته تنزل رغم إنه متصور معايا ومع بابلو بعد نهاية الندوة بعد ما بقوا أصدقاء خلاص وسيماجو أكد على بابلو إنه يرجع يكتب عنده في الصفحة عن الكرة الإسبانية تاني

بعد الندوة، قلنا نتمشى لحد الجيزة، بعدين فوجئنا بإيهاب مثبت عربية الوالد، قلنا فل، رغم إن العربية حادفة شمال بعبط طبعا بس أهو أرحم من المشي أو المواصلات بكتير، إيهاب طبعا سواق جامد وركناته عالية، رحنا الملتقى الدائم فينيسيا طبعا، وبعد شوية فيجو مشي ومحمد نصر معرفش ييجي عشان كالعادة راجع مهدود من البنك، رحنا أنا وإيهاب وسيماجو المهندسين نتعشى، وبعدين رجعنا الجيزة وكل تفرق
كان يوم جميل وفرحت فيه، شكرا بابلو، شكرا شلة الأنس