صحافة 2007 الدفعة الأسطورية

النهاردة وامبارح كنا بنعيش وداع محاضرات دفعة صحافة 2007 بكلية إعلام القاهرة، أفضل دفعة في تاريخ الكلية على الإطلاق بلا منازع أبدا..عملنا شغل جنوني تماما... دي صورة من امبارح بكاميرتي اللي صورت بيها الفنانة دينا سماحة (أفضل مصورة صحفية على الإطلاق)
من اليمين لليسار: أيمن الشربيني - أحمد الضبع -محمد الششتاوي (لبيك إن عطش اللواء) - حاتم رضا - عمرو فهمي - أحمد بدوي - أحمد عبد الجواد

الحقيقة أنا مش عارف أبتدي منين وأنهي منين، أنا بعشق حاجة اسمها الكلية، وبعشق قسم صحافة، وبعشق دفعتي، بجد بحبهم أوي واحد واحد... لأن لما ببص للدفعات اللي قبلنا واللي بعدنا بحس إننا متفوقين باكتساح (باستثناء منافسة مع دفعة 2004) وده شيء طبيعي جدا جدا.... المهم النهاردة وامبارح صور جماعية وفيديوهات وأغاني جماعية ومسرحيات وجنان، أحلى حاجة إننا كنا فرحانين بجد، ويا سلام بقى لما غنينا يا سهر الليالي للسيدة فيروز، مش ممكن... هحاول أجيب الفيديوهات دي إن شاء الله

دلوقتي بقى عايز أتكلم على وجه من أوجه التفوق الكاسح في دفعتنا، وهو التفوق الفعلي، مش مجرد درجات عالية وفي الآخر سراب، بالعكس الناس هايلة بشكل غير عادي، هقول شوية تعليقات ع الناس اللي فاكرهم، واللي متأكد إنهم صحفيين يعني صحفيين، واللي مش هفتكره رجاء ميزعلش... طبعا فيه ناس على جنب تماما

أيمن الشربيني: ليه أبدأ بأيمن؟ أيمن لازمني في الكلية طول 3 سنين في كل الأبحاث، وكان أول واحد تلقى مني فكرة مشروع التخرج وهي لسة وليدة، بنثق في قدرات بعض لأبعد مدى، وبنعرف كويس أوي نشتغل مع بعض، أيمن صحفي خطير، يعني بيعشق يكلم المصادر ويعمل مقابلات، متخصص في السياسة الخارجية وجامد جامد جامد، يعني قاري وكتّيب تقيل، وغير كدة ليه موقف واتجاه فكري، يعني مش عايش كدة، اشتغل في كذا حتى من أبرزهم إسلام أونلاين ومش عايزين نحرق الباقي...

أحمد بدوي (أمادو): وأمادو مدونته موجودة في اللينكات، بجانب خلافنا الفكري العميق، احنا بنلتقي إنسانيا أوي، وبحبه جدا وبيجبني جدا، وجميل أوي إن حد يمنحك ثقة إنك تقول إنه بيحبك وانت متأكد، أحمد بعيدا عن الراي، خبير في السينما، وكاتب جامد جدا في مجلة جودنيوز سينما الشهرية، أحمد إنسان حنون أوي، ربنا يخليه ليا دايما ويحتويني

إنجي غزلان: لو حد قال لي عرف لي الإنسانية مش هلاقي اسم أحسن من إنجي غزلان كتعريف، بكل المعاني اللي الإنسانية تعنيها، إنجي إنسانة صعب أوي تتكرر، لأن بريقها مبينطفيش أبدا، ورغم اننا نعرف بعض من سنتين إلا إنها دايما مبهرة، فاكر لما دينا قالت عليها إن عمرها ما ضايقت حد، وفعلا عصرت دماغي عشان افتكر موقف إنجي ضايقت فيه حد ملقتش، وأكيد مش هلاقي... هي حد تشكره على مجرد وجوده في الدنيا! إنجي صحفيا واجتماعيا نشطة جدا، يعني بجانب نشاطها المجتمعي مع اليونيسيف وما شابه، هي صحفية كويسة جدا، وليها حاجات اتنشرت دوليا (في الصحافة الأردنية مثلا؟) يمكن

دينا سماحة: مش غريب إني أقول إن دينا من أجدع الشخصيات اللي عرفتهم، حتما هي أجدع بنت شفتها، وفي نفس الوقت مصورة صحفية لا يُشق لها غبار، دينا شخصية إنسانة أوي، عمرها ما ضايقتني أبدا، خسارة عرفتها من تالتة بس، لكن بجد هي إنسانة رائعة أوي، ربنا يكرمك يا دينا

أميرة قاسم: أميرة دي شغلانة قلق!!! بنت الدرمللي على رأي مي، ليها وقفات جامدة جدا تحسسني إن ليا أخت معايا في الكلية، في نفس الوقت صحفية رهيبة، يعني علاقات اوعى وشك، أسلوبها في الكتابة جامد موت، شبابيا متميزة لمدى بعيد، مش فاكر اتعرفنا ازاي... بس أكيد انا الكسبان إني عرفتها، بس أميرة بردو أرذل حد يستخدم النقط على الماسنجر، بتفرسني بيهم لأني مبفهمش معناهم، وده مش انطباعي لوحدي ده انطباع عائشة كمان، غير كدة أميرة أنا خدت منها ابتسامة سحرية ع الماسنجر "نياها" وكل ما اكتبها لازم افتكرها، كانت معايا في المصري اليوم ساعة تدريبي وكنا اول مرة نتعرف عن قرب شوية، أميرة ومي اللي بعدها كانوا بيحسسوني إن ليا ظهر في الكلية، يعني ليا أختين ممكن يزلزلوا الزلازيل لو جرالي حاجة.... ربنا يخليهم دايما

مي كامل: دي حدوتة طويلة، مي إنسانة حنونة أوي، مش عايز أقول أكتر من كدة، بس بجد مي عزيزة عليا جدا، وليها وقفات معايا متتنسيش، صحفيا، مي أحسن حد شفته بيكتب للشباب في حياتي، ده بعيدا عن موهبتها الأدبية اللي أكدتها الصحافة، ربنا يوفقك يا مي دايما، مش هنسى إني أنا ومي اتقابلنا 3 مرات صدفة في يناير 2006، وصدف مليونية يعني واحد في المليون، آخر واحدة فيهم كانت هي في تاكسي وانا في شارع التحرير ولقتها بعتالي رسالة بتقولي لابس ازرق وبين قوسين (التالتة)، اتجننت طبعا... مي بردو أول بنت من الدفعة نتبادل أرقام الهواتف، ودي ثقة متبادلة عالية جدا

محمد قرنة: شاعر الصحافة وصحفي الشعراء، حلوة دي، بس دي مش كتير عليه أبدا، محمد شخصية جدعة أوي وبتسخن بسرعة جدا، يعني ممكن يقلب الترابيزة في أي وقت، بجانب كونه شاعر ناضج فعلا فهو صحفي جامد وأفكاره بتعجبني جدا لأنها دايما مختلفة، أسلوبه ساخر في الغالب، ربنا يكرمك يا زوزّة وأشوف ديوان الأعمال الكاملة بتاعك، بس تكون لسة عايش يعني، مش هنساله مغامرة قناة أبو إسلام الفضائية، متتكرش أبدا، بحبك يا ولد

محمد الششتاوي: الششتاوي صحفي تقيل تقيل تقيل، يعني سيد من يجيب الخبر أو التصريح من بذر العنب، لا يعترف بالصعوبات أبدا، لازم يرجع بحاجة، كييف جلد ذات بدون داعي، بس إنسان طيب بشكل ينرفز، يا أخي نفسي تدي نفسك حقها مرة واحدة... ربنا يكرمك يا محمد دايما، قلبك حنون جدا يا ولد

علا عبد الله: علا، صحفية المصري اليوم الناجحة جدا جدا، نحلة ما شاء الله، مثال للاجتهاد والجدعنة وكل قيمة طيبة، ورغم إنها من أكترنا انخراطا في الصحافة إلا إنها لسة زي ما هي بمثلها العالية وقيمها وضميرها اللي عمره ما هيموت، ربنا يخليكي لينا يا علا دايما، وميحرمناش قلمك "الحر"

أحمد الضبع: بغض النظر عن إن منصب نقيب الصحفيين مسألة وقت بالنسبة للضبع، فالضبع صعيدي جدع، مهنيا كويس، صحيح بيركز على موضوعات خنيقة بس متعمق فيها أوي وكتّيب تقيل، وأول واحد فينا قبض من الصحافة (خمسة وخميسة) بس هو يسيبه من "القضية" و"البراجماتية النفعية" و"النظرة الشيفونية" والكلام اللي حرقنا بيه ده

حاتم رضا: زي ما عرفته في الفيديو: صحفي الزمالك، بس هو بجد صحفي تقيل جدا، وفي الكورة إرهابي للاعبين، مجتهد وبيحب شغله، وفوق ده وده إنسان جدع جدا، كفاية إننا اشتغلنا فترة على نفس المكتب، ربنا يوفقك يا حاتم وميحرمناش طيبتك

أحمد عبد الجواد: مش هقول أكتر إننا لما كنا سوا في المصري اليوم نزل له خبر صفحة أولى، أحمد إنسان طيب أوي وصموت وعمره ما يفكر في إيذاء حد أبدا... ربنا يخليك يا أحمد

محمد فتحي: الشيخ الجامد أوي أوي أوي، يمكن أحن ولد فينا قلبيا، ليا معاه مواقف تموت من الضحك، بالذات لما كان يعوز يجيب حاجة من الكافيتريا ومش عارف بسبب تجمهر البنات، ربنا يخليك يا محمد دايما، مش هنسى بحث تاريخ الصحافة في سنة تانية، عملنا بحث نقدي رهيب قطّعنا فيه أحمد لطفي السيد.

عائشة الحداد: صعب اوي تلاقي حد بيجمع ما بين مهارتي التحرير والإدارة بجودة واحدة وعالية، ربنا يكرمك يا عائشة ودايما في القمة، علميا وعمليا وأخلاقيا وإنسانيا وفكريا

سلمى الجزار: يمكن سلمى أول بنت أعرفها من مشروعنا، بعيدا عن كونها أسطورة كرة الريشة، وأمل مصر في ميدالية غير أوليمبية، فهي بردو صحفية كويسة، فاكرلها من صوت الجامعة السنة اللي فاتت ولا اللي قبلها تحقيق عن الصندوق الاجتماعي، هي إنسانة طيبة أوي، وكوميدية جدا جدا - زي أنتيمتها دينا- ومش عارف ليه تحقيق الصندوق الاجتماعي ده علق معايا، بس يمكن عشان دي من الحاجات اللي انا مبعرفش أعملها، وبحس قدام كل واحد بيعملها إنه متفوق أوي، ربنا يخليكي لينا، ويخلي عدستك اللي صورتي بيها المعمار الإسلامي بشكل ميتنسيش في مشروع التصوير

أحمد عبد الحميد: الراجل ده بايع الصحافة، مع إن ليه حاجات جامدة وهو عارف، ولا نسأل محرم الراغب؟! على العموم أحمد إنسان حنون جدا وعاطفي جدا، وعصبي بأفورة، ربنا يسترها... مش هنسى أبدا انا وهو وأيمن وأمادو في فينيسيا، يا رب نفضل سوا دايما، وربنا ما يحرمني جدعنتك ووقوفك جنبي يا أحمد في كذا موقف، وربنا يسهل لك يا عم في رقم الـ.... اللي توسع أوي في رابعة

ألفت أحمد: ألفت إنسانة رقيقة جدا، وطيبة جدا، ومخرجة شاطرة جدا جدا جدا، ومجتهدة جدا جدا جدا، وبتظلم نفسها كتير جدا جدا جدا، ربنا يخليها جدا جدا جدا

سالي محمود: إممممم، أقول إيه، يمكن سالي أول واحدة حسستني إني بهلوان مثلا، مش عارف ليه كل ما أقول حاجة عادية وأبقى بتكلم جد تضحك!!! ربنا يخلي لنا روحها الحلوة ويضحكها على طول، سالي مصيدة الأخبار الأولى في الكلية، وبالتالي هي صحفية بطبيعتها، تعرف النملة بترضع ولادها امتى وفين، صحيح ساعات بتنقل الشائعات (بهزر) بس بردو مرصد إخباري

محمد جلال: الراجل ده عجيب، بس طيب اوي، سيبك إن عنيه بتضيق وكان مصدعنا بدندنة لعمرو دياب، بس ذكريات، أنا فاكر إنه كان من أول مجموعة فطرت معاها من الكلية في رمضان 2003، ومن أوائل الناس اللي اتعرفت عليهم، مهنيا جلال خرج من تحت ايده تلامذة كبار زي شوقي حامد في الأخبار مثلا

بيشوي عاطف: يمكن علاقتنا حيزهل قليل، بس بيشوي من خلال مواقفه معايا إنسان جدع وذوق جدا، مش هنسى اتصالاته بيا في المناسبات وغير المناسبات، صحفيا هو مخرج جامد وموهوب... يا رب تفتكرنا يا بيشو

إهداء لواحد غايب دايما بحبه، وبقوله عمري ما هنساك: أحمد عطية، بحبك أوي يا أحمد حتى وبيننا المحيط، عمري ما هنسى إنك كنت النص التاني في أول وأنجح دويتو عملي كنت فيه، عمري ما هنسى انفرادنا واحنا 18 سنة بس، دايما في قلبنا يا عطية

إهداء ليكم
الأغنية عرفتها من إنجي