أولى ثانوي

الورقة دي لقيتها وأنا بدعبس في درج من الأدراج، كانت عزيزة عليا أوي، لأنها فكرتني بسنة من أحلى سنين عمري وهي أولى ثانوي، بقالها ست سنين مروا هوا، أولى ثانوي كانت حلوة لسبب، إني مكنتش عايز أجيب مجموع عالي عشان فصل المتفوقين في تانية لأني كدة كدة أدبي يعني في فصل عادي.
كنت في فصل من فصول المتفوقين الستة في سنة أولى!!! طبعا غني عن التعريف إننا كنا 32 فصل في أولى وبقينا 30 بس في تانية و29 بس في تالتة ، في فيه سنة كان عدد المنتظمين سبعة آلاف طالب باين بالثانوي الرياضي اللي معانا، كنا جيش!

بعتز بمدرستي جدا، لأن السنة اللي فاتت كانت مئويتها، وهي اللي خرج منها أول شهداء الحركة الطلابية في مصر قبل إنشاء الجامعة أصلا!

في المبنى الرئيسي كاتبين يافطة تحسسك بالمسئولية قال يعني "السعيدية معقل الرجال" وطبعا ده تعبير عن واقع قبل ما يكون توسم في الشباب اللي هناك، أنا كنت في مبنى السادات في سنة أولى، وده كان أحدث مبنى بس كان شبه مدرستي الإعدادية أوي، اللي هي كانت بدورها عبارة عن ساحة رماية لمدرستي الثانوية في السابق، وده سر تاني من أسرار اعتزازي بالمدرسة إننا كنا مدرسة عسكرية، وكان فيه ممثل من القوات المسلحة بيتحكم فيها بس طبعا بلا جدوى.

أولى ثانوي سنة رائعة، كمية رهيبة من المواد، اتعرفت فيها على محمود وجيه اللي لسة مكملين صداقتنا مع بعض وانضم لنادي الأصدقاء القديم بتاع إعدادي، خلال السنة دي رحت كل المباريات الممكنة في الاستاد، حتى الضعيف فيها بداية من مصر والمغرب والأهلي وريال مدريد، وصولا إلى الأهلي والترسانة والفرق دي، بردو السينما، دخلت أفلام كتير منها أفلام هابطة فعلا بس أحلى فيلم كان مع محمود يوسف القاضي في سينما مترو اللي هو كان اسمه The Mummy Returns

فاكر كويس أوي يوم 6 مايو اللي كان فيه امتحان العملي بتاع الكيمياء، كنت بعمل تجربة غبية اوي بإذابة مسحوق وبعدين قياس مش عارف ايه، المهم وانا داخل المعمل الأساتذة عملوا عليا فيلم عشان علم مصر في ايدي ولابس تي شيرت المنتخب، بعد اللجنة زوغنا بمعجزة عشان نلحق ماتش مصر والسنغال من بدري في مكان حلو.

كان بيدرس لنا مدرس رياضيات عامل لنا رعب أزلي، شاءت الظروف إننا اللي نرعبه لما درس لنا إحصاء في تالتة، وكان مدير مبنى السادات وقتها مشهود له بالجنون بس كنا بنضحك بهبل عليه يعني.

بس مش شرط تكون أولى ثانوي السنة الأحلى في حياتي، تالتة كانت حلوة أوي عشان اتجمعت أنا وفاروق ومحمود القاضي تاني في 3-17 بعد غياب خمس سنين عن آخر سنة كنا فيها سوا، غير إن كل يوم أربعاء كان يعني سينما أوديون بس حفلة 10 صباحا، ولحد دلوقتي سواء الطلبة المعاصرين أو القدامى محدش يعرف ليه حفلة 10 في سينما أوديون كلها طلبة السعيدية!!! حاجة زي سور جنينة الحيوانات اللي لازم نقعد عليه لحد أواخر الحصة الأولى عشان تخلص وبعد كدة نطلع متأخر ، مش عايز أطول أكتر بس ذكريات افتكرتها مع شهر مايو اللي بيفكرني بنهاية كل عام دراسي.

نسيت بردو أقول إن طلبة السعيدية بيتعاملوا مع طلبة المدارس الأخرى -باستثناء أحمد لطفي السيد اللي كانت بتمثل لنا دربي الجيزة- بشيء من الاستعلاء من ناحية الرجولة، يعني طلبة المدراس الأجنبية دول من الآخر كانوا في نظرنا مش رجالة أبدا، نفس الشيء مع المدارس الخاصة والمدارس الحكومية التانية بردو، طبعا الصورة اتغيرت الحمد لله عشان محدش يزعل، بس هو اعتزاز أوي، يمكن ده حسيته وافتكرته وأنا في الجامعة لما حد كان بيسألني كنت فين في ثانوي وأقوله السعيدية كان وشه يتقلب بتوجس فجأة! وكأني قلت له إني خارج من الأحداث مثلا!!! يمكن حادثة حريق غرفة الغياب في سنة أولى أثر جامد على سمعة المدرسة، طبعا بجانب اشتراكها بأعداد مهولة مع طلبة جامعة القاهرة في مظاهرات الانتفاضة.... أيام!